365తెలుగుడాట్ కామ్ ఆన్ లైన్ న్యూస్,హైదరాబాద్, అక్టోబర్ 6,2025 :సామాన్యంగా వీసా నిబంధనలపై ఉన్న గందరగోళం, ఆందోళన మధ్యలో కూడా, అమెరికాలో శాశ్వత నివాసం (గ్రీన్ కార్డ్) పొందడానికి EB-5 ఇన్వెస్టర్ వీసా ప్రోగ్రామ్ అత్యంత వేగవంతమైన మార్గంగా ఉందని అమెరికా ఇమ్మిగ్రేషన్ నిపుణులు స్పష్టం చేశారు.
సోమవారం హైదరాబాద్‌లోని ఫెడరేషన్ ఆఫ్ తెలంగాణ ఛాంబర్స్ ఆఫ్ కామర్స్ అండ్ ఇండస్ట్రీ (FTCCI)లో న్యూయార్క్ ఇమ్మిగ్రేషన్ ఫండ్ ఆధ్వర్యంలో ఈ EB-5 ప్రోగ్రామ్‌పై అవగాహన కార్యక్రమం జరిగింది.
భారతీయులకు దీర్ఘకాలిక పెండింగ్‌ల నుండి విముక్తి..
మీడియాతో మాట్లాడిన ప్రముఖ ఇమ్మిగ్రేషన్ అటార్నీ ఇల్యా ఫిష్కిన్, ఇతర కేటగిరీల్లో భారతీయ ఇమ్మిగ్రెంట్లకు దీర్ఘకాలిక పెండింగ్‌లు ఉన్నందున, వలస నియమాలపై ఉన్న ఆందోళనల మధ్య EB-5 ప్రోగ్రామ్ ఒక వరంలా మారిందని తెలిపారు.
“EB-5 అనేది ‘సెల్ఫ్-స్పాన్సర్డ్’ ప్రోగ్రామ్. దీనికి ఎంప్లాయర్ స్పాన్సర్‌షిప్ అవసరం లేదు, ఇది పెట్టుబడిదారుడికి ఎక్కువ నియంత్రణను ఇస్తుంది” అని ఆయన పేర్కొన్నారు.
పెట్టుబడి పెట్టేటప్పుడు జాగ్రత్తలు అవసరం
అయితే, ఇన్వెస్టర్లు తప్పనిసరిగా రీజినల్ సెంటర్లను, వాటి ప్రాజెక్టులను జాగ్రత్తగా పరిశీలించాలని శ్రీ ఫిష్కిన్ హెచ్చరించారు. ముఖ్యంగా, ప్రాజెక్టుల గత చరిత్ర, పెట్టుబడిదారులకు పెట్టుబడిని తిరిగి ఇచ్చిన విధానం, శాశ్వత గ్రీన్ కార్డుల ఆమోదం, ప్రాజెక్టు పూర్తికి EB-5 నిధులపై ఎంతవరకు ఆధారపడుతున్నారు వంటి అంశాలను పరిశీలించాలి అని సూచించారు.
ట్రంప్ నిబంధనల మధ్య పెరుగుతున్న ఆదరణ
అమెరికా అధ్యక్షుడు డొనాల్డ్ ట్రంప్ వీసా నిబంధనలను కఠినతరం చేస్తున్నప్పటికీ, ఎక్కువ మంది భారతీయులు అమెరికా ప్రభుత్వ ప్రోత్సహించే “Invest in the US and Get a Green Card” పథకానికి (అధికారికంగా EB-5 Immigrant Investor Program) వైపు మొగ్గు చూపుతున్నారు. ఈ పథకం ద్వారా పెట్టుబడి పెట్టడానికి సిద్ధంగా ఉన్నవారు అమెరికాలో శాశ్వత నివాసం పొందవచ్చు.
EB5ive ఇమ్మిగ్రేషన్ సర్వీసెస్ భాగస్వాములైన సుబ్బా రాజు పేరిచెర్ల ,సంపన్న్ మల్హోత్రా మాట్లాడుతూ, “విదేశీయులు అమెరికాలో శాశ్వత నివాసం పొందడం కష్టతరమవుతున్న ప్రస్తుత తరుణంలో, అమెరికా ప్రభుత్వం ఫెడరల్ చట్టం ద్వారా ఈ మార్గాన్ని కల్పిస్తోంది.
అర్హత ఉన్న వ్యక్తులు, వారి కుటుంబ సభ్యులకు పెట్టుబడి ద్వారా శాశ్వత హోదాను పొందే మార్గాన్ని EB-5 అందిస్తోంది” అని వివరించారు.
ప్రస్తుతం ఈ బృందం హైదరాబాద్‌లో పరిశ్రమ సంస్థలు, పెట్టుబడిదారులకు అవగాహన కల్పిస్తోంది. త్వరలో వారు విశాఖపట్నం, విజయవాడలలో కూడా పర్యటించి ఈ ప్రోగ్రామ్‌ను మరింత విస్తరించనున్నారు.