365తెలుగు డాట్ కామ్ ఆన్ లైన్ న్యూస్,హైదరాబాద్, నవంబర్ 14, 2025: భారతదేశంలో అతిపెద్ద ప్రైవేట్ రంగ గ్రాస్‌రూట్స్ క్రీడా ఉద్యమంగా మారిన యూబీఎస్ అథ్లెటిక్స్ కిడ్స్ కప్ 2025 రెండో సీజన్‌లోనే 2,500కు పైగా పాఠశాలల నుంచి 2 లక్షలకు పైగా పిల్లలను చేర్చుకుంది.
యూబీఎస్ మద్దతుతో డీఎస్‌పవర్‌పార్ట్స్ సహా వ్యవస్థాపకులు నిర్వహిస్తున్న ఈ కార్యక్రమం అన్ని సామాజిక, ఆర్థిక, సాంస్కృతిక నేపథ్యాలకు చెందిన పిల్లలను ఒక్క త్రాటిపై నిలిపింది. బీచ్‌లు, పాఠశాల ఆవరణలు, తాత్కాలికంగా మూసివేసిన రోడ్లు – ఎక్కడైనా సరే స్థానిక పోటీలు నిర్వహించి పాఠశాలలు సృజనాత్మకతను ప్రదర్శించాయి.
ఒలింపిక్ బంగారు పతక విజేత, కార్యక్రమ అంబాసిడర్ నీరజ్ చోప్రా మాట్లాడుతూ, “ఇంతమంది పిల్లలు సంతోషంగా, సులభంగా అథ్లెటిక్స్‌ను ఆరంభించడం చూడటం ఆనందంగా ఉంది. నేపథ్యం ఏమైనా సరే ప్రతి బిడ్డకూ క్రీడలో పాల్గొనే, సవాళ్లు స్వీకరించే, పెద్ద కలలు కనే అవకాశం ఇవ్వడమే ఈ కప్ ప్రత్యేకత” అని అన్నారు.
నవంబర్ 1 నుంచి జనవరి 17 వరకు ముంబై, హైదరాబాద్, పూణె, చెన్నైలలో మొత్తం 13 రీజనల్ & గ్రాండ్ సిటీ ఫైనల్స్ జరగనున్నాయి. వందల పాఠశాలల నుంచి ఎంపికైన టాప్ యువ అథ్లీట్లు ప్రొఫెషనల్ వాతావరణంలో పోటీ పడనున్నారు.
డీఎస్‌పవర్‌పార్ట్స్ సీఈఓ & సహ వ్యవస్థాపకుడు డేనియల్ షెంకర్ అన్నారు: “రెండో సీజన్‌లోనే 2 లక్షల మంది పిల్లలు చేరారంటే… పదేళ్ల తర్వాత ఎంతమంది మరింత చురుకుగా, ఆత్మవిశ్వాసంతో ఉంటారో, ఎంతమంది భవిష్యత్ భారత ఛాంపియన్లుగా మారతారో ఊహించుకోవచ్చు.”
యూబీఎస్ ఇండియా సర్వీస్ కంపెనీ హెడ్ మథియాస్ షాకే మాట్లాడుతూ, “పతకాలు మాత్రమే కాదు… ప్రతి బిడ్డ జీవితంలో క్రీడ సహజ భాగంగా మారాలి. బలమైన, ఆరోగ్యవంతమైన, కనెక్టెడ్ తరాన్ని తయారు చేయడమే మా లక్ష్యం” అని చెప్పారు.
పిల్లల్లో పెరుగుతున్న జీవనశైలి వ్యాధులను అధిగమించడంతోపాటు దేశ ఒలింపిక్ భవిష్యత్తుకు బలమైన పునాది వేయడమే ఈ ఉద్యమ లక్ష్యం. మొదటి సీజన్‌లో కొన్ని వేల మందితో మొదలైన ఈ ప్రయాణం ఇప్పుడు దేశవ్యాప్త ఉద్యమంగా మారింది.