365తెలుగు డాట్ కామ్ ఆన్ లైన్ న్యూస్, హైదరాబాద్, డిసెంబర్ 21,2025 : భారతదేశంలో వేగంగా ఎదుగుతున్న ప్రముఖ రియల్ ఎస్టేట్ సంస్థ ఏఎస్బిఎల్ (ASBL) తమ గృహయజమానులు, వారి కుటుంబాల కోసం ‘ఏఎస్బిఎల్ ఫ్యామిలీ డే–2025’ కార్యక్రమాన్ని ఘనంగా నిర్వహించింది.
హైదరాబాద్ ఫైనాన్షియల్ డిస్ట్రిక్ట్లోని అన్వయ కన్వెన్షన్స్లో జరిగిన ఈ వేడుక, కమ్యూనిటీ భావన, పరస్పర నమ్మకం, భాగస్వామ్య విజయాలను ప్రతిబింబించేలా సాగింది.
కస్టమర్లతో ఏఎస్బిఎల్ సంబంధం కేవలం లావాదేవీల వరకే కాకుండా, దీర్ఘకాలిక అనుబంధంగా కొనసాగుతుందనే ఆలోచనకు ఈ కార్యక్రమం ప్రతీకగా నిలిచింది. కుటుంబాలను ఒకే వేదికపైకి తీసుకువచ్చి, అనుసంధానిత విలువలతో సమాజ నిర్మాణానికి తమ నిబద్ధతను సంస్థ మరోసారి స్పష్టం చేసింది.
కార్యక్రమం జ్యోతి ప్రజ్వలనతో ప్రారంభమై, ఆహ్లాదకరమైన సాంస్కృతిక కార్యక్రమాలతో సందడిగా సాగింది.
నృత్య ప్రియచే శాస్త్రీయ నృత్య ప్రదర్శన, శ్రావ్య మానస బృందం రామాయణ స్కిట్, మహిళల నృత్య బృందం ‘యో హైనెస్’ ప్రదర్శన, ‘నిరవల్ – ది బ్యాండ్’ ప్రత్యక్ష సంగీత కార్యక్రమం ప్రేక్షకులను ఆకట్టుకున్నాయి. మ్యూజికల్ ఓపెన్ మైక్, డీజే నైట్ అన్ని వయసుల వారికి ప్రత్యేక ఆకర్షణగా నిలిచాయి.
ఈ సందర్భంగా ఏఎస్బిఎల్ వ్యవస్థాపకుడు, సీఈఓ అజితేష్ కొరుపోలు మాట్లాడుతూ, సంస్థ వృద్ధిలో కస్టమర్ల పాత్ర అమూల్యమని పేర్కొన్నారు. “ఇల్లు అంటే కేవలం భవనాలు మాత్రమే కాదు. కుటుంబాలు పెరిగే, జీవితం రూపుదిద్దుకునే వ్యవస్థలు. మా కస్టమర్లు మాపై ఉంచిన నమ్మకమే ఏఎస్బిఎల్ విజయానికి పునాది” అని అన్నారు.
హైదరాబాద్ వేగంగా టెక్నాలజీ, మౌలిక సదుపాయాల కేంద్రంగా ఎదుగుతున్న తీరును వివరించిన ఆయన, పట్టణీకరణతో వచ్చే సవాళ్లను కూడా ప్రస్తావించారు. మానవ-కేంద్రీకృత పట్టణ రూపకల్పన అవసరాన్ని నొక్కిచెప్పారు.
ఈ కార్యక్రమంలో భాగంగా, మానవ-కేంద్రీకృత డిజైన్పై దృష్టి సారించిన కొత్త డిజైన్ స్టూడియో AAED ఆవిష్కరణ, నాన్-కన్వర్టిబుల్ డిబెంచర్ల ప్రవేశం, భవిష్యత్తులో పబ్లిక్ లిస్టింగ్ లక్ష్యాలను ఏఎస్బిఎల్ ప్రకటించింది. అలాగే ఏఎస్బిఎల్ ఫౌండర్స్ క్లబ్ ప్రారంభాన్ని ప్రకటించి, పిల్లల నైపుణ్యాభివృద్ధి, కమ్యూనిటీ కార్యక్రమాలపై దృష్టి పెట్టనున్నట్లు తెలిపింది.
ఏఎస్బిఎల్ ఫ్యామిలీ డే 2025, ఇళ్లు నిర్మించడం కంటే మిన్నగా, శాశ్వత సమాజాలను నిర్మించాలనే సంస్థ తత్వాన్ని మరోసారి స్పష్టంగా చూపించింది.