చెరువుల రక్షణలో ‘హైడ్రా’ వెనకడుగు వేయదు పేదల జోలికి వెళ్లం..

365తెలుగు డాట్ కామ్ ఆన్ లైన్ న్యూస్, హైదరాబాద్ , జనవరి 25,2026:నగరంలోని చెరువుల పరిరక్షణ, ఆక్రమణల తొలగింపులో హైడ్రా (HYDRAA) తన దూకుడును కొనసాగిస్తుందని ఆ సంస్థ కమిషనర్ ఏవీ రంగనాథ్ స్పష్టం చేశారు. పర్యావరణ పరిరక్షణే లక్ష్యంగా అడుగులు వేస్తున్నామని, ఇందులో ఎలాంటి రాజీ ఉండదని ఆయన పునరుద్ఘాటించారు. ఆదివారం రెడ్ హిల్స్‌లో ‘హరిత చైతన్య కళాక్షేత్రం’ ఆధ్వర్యంలో జరిగిన సింగరేణి మాజీ ఉద్యోగుల సమ్మేళనంలో ఆయన ముఖ్య అతిథిగా ప్రసంగించారు.

ఆక్రమణల తొలగింపుతో పాటు ఆహ్లాదకరం..
కేవలం ఆక్రమణలను కూల్చివేయడమే హైడ్రా పని కాదని, ఆ ప్రాంతాలను ప్రజలకు ఉపయోగపడేలా తీర్చిదిద్దడమే తమ అసలు లక్ష్యమని కమిషనర్ పేర్కొన్నారు.

ఆరోగ్య కేంద్రాలుగా చెరువులు: విషతుల్యంగా మారిన చెరువులను శుభ్రపరిచి, గుర్రపుడెక్కను తొలగిస్తాం.

క్రీడా మైదానాలు: చెరువుల చుట్టూ వాకింగ్ ట్రాక్‌లు, పిల్లలు, యువత ఆడుకునేలా క్రీడా మైదానాలను ఏర్పాటు చేస్తున్నాం.

లక్ష్యం: ఇప్పటికే 1000 ఎకరాలకు పైగా ప్రభుత్వ భూములను రక్షించాం. ఈ ఏడాది మరో 2000 ఎకరాల కబ్జాలను తొలగించి, సుమారు లక్ష కోట్ల రూపాయల విలువైన ఆస్తులను కాపాడటమే లక్ష్యంగా పెట్టుకున్నాం.

ఇదీ చదవండి..గల్ఫ్ దేశాల్లోనే అతిపెద్ద ఫిల్మ్ రిస్టోరేషన్ కేంద్రం ప్రారంభం..

Read this also..Prasad and World Sound & Vision Launch GCC’s Largest Film Restoration Centre in Riyadh..

Read this also..Flipkart Unveils ‘Crafted by Bharat’ Sale for Republic Day..

పేదలకు అభయం.. కబ్జాదారులకు హెచ్చరిక!
పేదల గృహాలను కూల్చే ఉద్దేశం హైడ్రాకు లేదని రంగనాథ్ ఈ సందర్భంగా భరోసానిచ్చారు. అయితే, పేదలను ముందు పెట్టి, వెనుక ఉండి చెరువులను ఆక్రమించే బడా బాబులను, కబ్జాదారులను ఎట్టి పరిస్థితుల్లోనూ వదిలిపెట్టే ప్రసక్తే లేదని ఆయన హెచ్చరించారు.

పర్యావరణమే ప్రాణం..
కేంద్ర పర్యావరణ శాఖ సీనియర్ సైంటిస్ట్ తరుణ్ కత్తుల మాట్లాడుతూ.. పర్యావరణానికి ముప్పు కలిగించే ఏ పరిశ్రమకైనా, గనుల తవ్వకానికైనా అనుమతులు ఇచ్చేది లేదని స్పష్టం చేశారు. పొల్యూషన్ కంట్రోల్ బోర్డ్ సోషల్ సైంటిస్ట్ శ్రవణ్ కుమార్ మాట్లాడుతూ.. ప్రతి ఒక్కరూ ప్లాస్టిక్ వాడకాన్ని వీడాలని, సీనియర్ సిటిజన్లు భావి తరాలకు మార్గదర్శకులుగా నిలవాలని కోరారు.

హరిత చైతన్య కళాక్షేత్ర వ్యవస్థాపకులు గణాశంకర్ పూజారి మాట్లాడుతూ.. పాటలు, సాంస్కృతిక కార్యక్రమాల ద్వారా పర్యావరణ చైతన్యం కల్పిస్తున్నామన్నారు. ఈ కార్యక్రమంలో సింగరేణి మాజీ డైరెక్టర్లు జేవీ దత్తాత్రేయులు, ఏ మనోహర్, ఎస్ చంద్రశేఖర్, జీవీ రెడ్డి తదితరులు పాల్గొన్నారు