365తెలుగు డాట్ కామ్ ఆన్ లైన్ న్యూస్,నవంబర్ 14,2025: ఉత్తరప్రదేశ్‌లో ఆయుష్మాన్ భారత్ యోజన (Ayushman Bharat Yojana) కింద జరుగుతున్న భారీ మోసం, నకిలీ కార్డుల వ్యవహారం ఇప్పుడు సంచలనం రేపుతోంది. 450కి పైగా నకిలీ ఆయుష్మాన్ కార్డులు తయారైనట్లు లక్నోలో గుర్తించారు.
ఈ కుంభకోణంలో పాల్గొన్న సూత్రధారులను పట్టుకునేందుకు ‘సాచిజ్’ (State Agency for Comprehensive Health and Integrated Services – SachiZ),పోలీసులు సంయుక్తంగా దర్యాప్తును ముమ్మరం చేశారు.
ఆధార్ లింక్‌తో అసలు కథ..
ఈ మోసగాళ్లు నకిలీ కార్డులను సృష్టించేందుకు వీలుగా, ఆధార్ కార్డులకు లింక్ అయిన మొబైల్ నంబర్లను మార్చినట్లు దర్యాప్తు అధికారులు గుర్తించారు.
దీని వెనుక ఉన్న వ్యక్తులను పట్టుకునేందుకు, ఆధార్ డేటాను నిర్వహించే యూఐడీఏఐ (UIDAI) నుంచి మొబైల్ నంబర్లను మార్చినవారి పూర్తి వివరాలను ‘సాచిజ్’,పోలీసులు కోరారు. ఆ డేటా ఆధారంగా త్వరలోనే నిందితులను అదుపులోకి తీసుకునే అవకాశం ఉంది.
ఆసుపత్రిపై వేటు, ఆయుష్మాన్ మిత్ర కోసం వేట..
ఈ కుంభకోణంలో బరేలీ (Bareilly) జిల్లాలోని బేగ్ ఆసుపత్రి (Beg Hospital) పాత్ర ఉన్నట్లు తేలడంతో, ఆసుపత్రితో ఉన్న ఒప్పందాన్ని తక్షణమే రద్దు (Suspension) చేశారు. అంతేకాకుండా, ఈ మోసంలో కీలకపాత్ర పోషించినట్లు అనుమానిస్తున్న ‘ఆయుష్మాన్ మిత్ర’ కోసం పోలీసులు గాలింపు చర్యలు చేపట్టారు. నకిలీ కార్డుల తయారీ వెనుక పెద్ద నెట్‌వర్క్ ఉండవచ్చని అధికారులు అనుమానిస్తున్నారు.