365తెలుగు డాట్ కామ్ ఆన్ లైన్ న్యూస్,హైదరాబాద్, డిసెంబర్ 22, 2022: హైదరాబాద్ నగరంలో ప్రముఖ కంపెనీలు తమ సేవలను విస్త రించేందుకు సిద్ధమయ్యాయి.
భారత దేశపు అగ్ర ప్రిసెషన్ ఇంజనీరింగ్ కంపెనీ ఆజాద్ ఇంజనీరింగ్ జపాన్ కు చెందిన మిత్సుబిషి హెవీ ఇండస్ట్రీస్ కోసం ప్రత్యేక తాయారీ కేంద్రాన్ని నిర్మించేందుకు బుధవారం శంకుస్థాపన చేసింది.
హైదరాబాద్ పరిధిలోని మేడ్చల్ తునికిబొల్లారం వద్ద 11,800 చదరపు మీటర్ల స్థలంలో నిర్మించ తలపెట్టిన ఈ తయారీ కేంద్రానికి ఆజాద్ ఇంజనీరింగ్ ప్రైవేట్ లిమిటెడ్ మేనెజింగ్ డైరెక్టర్ రాకేష్ చోప్దార్ శంకుస్థాపన చేసారు.
ఆజాద్ ఇజనీరింగ్ – మిత్సుబిషి అనుబంధం మెషినరీ కొనుగోళ్ళతో మొదలై పదేళ్లైందని, ఆజాద్ యూనిట్ లో మిత్సుబిషికి విడిగా తాయారీ కేంద్రాన్ని కేటాయించడం వరకు ఎదిగి ఇప్పుడు జపాన్ కంపెనీకి ప్రత్యేక తాయారీ కేంద్రాన్ని ఏర్పాటు చేసే స్థాయికి ఆ అనుబంధం బలపడిందని రాకేష్ చోప్దార్ అన్నారు.
నూతన తయారీ కేంద్ర నిర్మాణానికి 20 మిలియన్ డాలర్ల (సుమారు 150 కోట్ల రూపాయలు) వ్యయమవుతుందని, 2024 సంవత్సరంలో ఉత్పత్తి పనులు ప్రారంభమవుతాని రాకేష్ చోప్దార్ తెలిపారు.
ఇదే ఆవరణలో నిర్మింప తలపెట్టిన ఆజాద్ ఇంజనీరింగ్ సెంటర్ ఆఫ్ ఎక్సలెన్స్ & ఇన్నోవేషన్ లో నూతన తయారీ కేంద్రం అంతర్భాగమని ఆయన చెప్పారు. ఇందులో సుమారు 300 నైపుణ్య కార్మికులకు ఉపాధి లభిస్తుందన్నారు.
విదేశాలలో తమ తొలి ప్రత్యేక తయారీ కేంద్ర నిర్మాణానికి ఆజాద్ ఇంజనీరింగ్ ను భాగస్వామిగా ఎంచుకోవడానికి కారణాలు వివరిస్తూ, మిత్సుబిషి హెవీ ఇండస్ట్రీస్ డిప్యూటీ సీఈఓ కె. తనక “మెషినరీ తయారీలో ఆజాద్ మేటి.
మా కంపెనీ గ్యాస్, స్టీమ్ టర్బైన్ల కోసం అవసరమైన విడి భాగాలను వారు ఉన్నత ప్రమాణాలతో నాణ్యమైనవి తయారు చేసి అందజేస్తారు. అందుకే ఆజాద్ కంపెనీతో మా బంధాన్ని పటిష్టం చేసుకోవడం ఆనందంగా ఉంది.”
మిత్సుబిషి (జపాన్) ఇంజనీరింగ్ హెడ్ రాజా రామ్ రెడ్డి మాట్లాడుతూ “మిత్సుబిషి నాణ్యతా ప్రమాణాలు ప్రపంచంలోనే అత్యున్నతమైనవి. వీటికి అనుగుణంగా నాణ్యమైన యంత్ర భాగాలను అందించే విదేశీ కంపెనీ భారత్ కు చెందిన ఆజాద్ ఇంజనీరింగ్ మాత్రమే.
వాణిజ్య భాగస్వాముల అవసరాలకు ప్రాధాన్యత ఇస్తూ పోటీ ధరలకు మెరుగైన ఉత్పత్తులను అందించడంలో ఆజాద్ అగ్ర స్థానంలో నిలుస్తుంది. ఉత్పత్తుల సరఫరా విషయంలో నిర్ణీత గడువులను నిక్కచ్చిగా పాటించే ఆజాద్ అంటే మాకు సంపూర్ణ విశ్వాసం.”
ఈ సందర్భంగా తెలంగాణ ప్రభుత్వ పరిశ్రమల శాఖ ప్రిన్సిపల్ సెక్రెటరీ జయేష్ రంజన్ ఆజాద్, మిత్సుబిషి లను అభినందించారు. “ప్రపంచ దిగ్గజ కంపెనీలకు తయారీ కేంద్రాల స్థాపనకు తెలంగాణ తొలి గమ్యంగా మారిందని ఇరు కంపెనీలు మరో మారు ధృవీకరించాయి.
విమానయాన, ప్రిసిషన్ ఇంజనీరింగ్ రంగాల ఇతర కంపెనీలు కూడా రాష్ట్రంలో పెట్టుబడులకు ముందుకు రావడానికి ఇలాంటి ఒప్పందాలు దోహదం చేస్తాయని ఆశిస్తున్నాము” అని ఆయన అన్నారు.
ఈ కార్యక్రమంలో మిత్సుబిషి ఛైర్మన్ – మేనేజింగ్ డైరెక్టర్ టి. నగయసు మిత్సుబిషి డిప్యూటీ సీఈఓ కె. తనక డిప్యూటీ జీఎం ఎం హజెగవ ఇంజనీరింగ్ హెడ్ రాజా రామ్ రెడ్డి తెలంగాణ ప్రభుత్వ పరిశ్రమల శాఖ ప్రిన్సిపల్ సెక్రెటరీ జయేష్ రంజన్ తెలంగాణ ఏరోస్పేస్ & డిఫెన్స్ శాఖ డైరెక్టర్ ప్రవీణ్ పీ ఏ, తెలంగాణ శాసన సభ్యుడు కే పీ వివేకానంద పాల్గన్నారు.