365తెలుగు డాట్ కామ్ ఆన్‌లైన్ న్యూస్, హైదరాబాద్, నవంబర్ 14,2022: మధుమేహం అనేది మనిషి ఆరోగ్యంపై తీవ్ర ప్రభావం చూపిస్తుంది. ఇది ఒక్క దేశంలోనేకాదు ప్రపంచ వ్యాప్తంగా ప్రజల ఆరోగ్యంపై ప్రభావం చూపుతూనే ఉంది. రక్తంలో గ్లూకోజ్ లేదా చక్కెర స్థాయిలు అధికంగా ఉన్నప్పుడు ఇది ఒక పరిస్థితి, ఇది మూత్రపిండాల వైఫల్యం, హార్ట్ స్ట్రోక్ వంటి ఇతర తీవ్రమైన సమస్యలు వచ్చే ప్రమాదం ఉందని వైద్యనిపుణులు చెబుతున్నారు. ఈ మహమ్మారి గురించి అవగాహన కల్పించడం చాలా అవసరం. నవంబర్ 14తేదీన వరల్డ్ డయాబెటీస్ డే సందర్భంగా ప్రత్యేక కథనం..
దీర్ఘకాలిక వ్యాధి సమస్యలపై ప్రజల్లో అవగాహన కల్పించడానికి ప్రతి సంవత్సరం నవంబర్ 14న ప్రపంచ మధుమేహ దినోత్సవాన్ని జరుపుతున్నారు. ప్రపంచ ఆరోగ్య సంస్థ మద్దతుతో అంతర్జాతీయ మధుమేహ సమాఖ్య1991లో వరల్డ్ డయాబెటిస్ డే ను ప్రతిపాదించింది. ఐక్యరాజ్యసమితి ఆమోదంతో 2006లో అధికారిక దినోత్సవంగా మారింది.
మీరు మధుమేహ వ్యాధిగ్రస్తులైతే, మీ ఆహారపు అలవాట్లను తప్పనిసరిగా మార్చుకోవాలి. అన్నింటికంటే, మీ రక్తంలో గ్లూకోజ్, రక్తపోటు, కొలెస్ట్రాల్ స్థాయిలను ఎలా మేనేజ్ చేయాలో మీరు తెలుసుకోవాలి. నవంబర్ 14న ప్రపంచ మధుమేహ దినోత్సవం సందర్భంగా, మధుమేహ వ్యాధిగ్రస్తులకు మేలు చేసే కొన్ని ఆహార పదార్థాలను గురించి ఇప్పుడు తెలుసుకుందాం. మధుమేహ వ్యాధిగ్రస్తులు ,ఆరోగ్యవంతమైన జీవితాన్ని గడపడమేకాకుండా, తప్పనిసరిగా కొన్నిరకాల ఆహార పదార్థాలను రోజువారీ ఆహారంలో చేర్చుకోవాలి.
సిట్రస్ పండ్లు: నారింజ -నిమ్మ వంటి పండ్లు షుగర్ ఉన్నవాళ్లు తమ ఫుడ్ మెనులో చేర్చుకోవాలి. సిట్రస్ పండ్లలో పొటాషియం, ఫోలేట్‌తో పాటు ఆరోగ్యకరమైన ఫైబర్ ఉంటుందని అమెరికన్ డయాబెటిస్ అసోసియేషన్ తెలిపింది. ఇవి రక్తంలో చక్కెర స్థాయిలను నియంత్రించడంలో మధుమేహాన్నిమేనేజ్ చేయడంలో సహాయపడతాయి.
పెరుగు:పెరుగును సాధారణంగా బహుళ ప్రయోజనాల కోసం ఉపయోగిస్తారు. డయాబెటిస్ ఉన్నవారు తమఆహారంలో ప్రతిరోజూ పెరుగు ఉండేలా చూసుకోవాలి. హార్వర్డ్ స్కూల్ ఆఫ్ పబ్లిక్ హెల్త్ పరిశోధకుల అధ్యయనంలో పెరుగు తీసుకోవడం వల్ల టైప్-2 డయాబెటిస్ రిస్క్ తగ్గుతుందని తేలింది. పెరుగులో కాల్షియం, ప్రోటీన్లు పుష్కలంగా ఉంటాయి. ఒక్క షుగర్ ను అదుపులో ఉంచడమేకాకుండా ఆరోగ్యాన్ని మెరుగుపరచడంలో పెరుగు కీలక పాత్ర పోషిస్తుంది.
చియా విత్తనాలు: చియా గింజలు బరువు తగ్గడంలో సహాయపడే ప్రభావవంతమైన సూపర్‌ఫుడ్‌గా పరిగణిస్తారు. మధుమేహాన్ని నియంత్రించడంలో చియా విత్తనాలు కూడా మీకు సహాయపడతాయని నిపుణులు సూచిస్తున్నారు. వీటిలో యాంటీ ఆక్సిడెంట్లు, ఒమేగా-3 ఫ్యాటీ యాసిడ్స్, మెగ్నీషియం, ఫైబర్ ఉంటాయి. ఈ పోషకాలు టైప్ 2 డయాబెటిస్ ప్రమాదాన్ని , దానితో సంబంధం ఉన్న సమస్యలను తగ్గించడంలో సహాయపడతాయి.
మిక్స్డ్ నట్స్:మీరు బాదం వంటి కొన్ని మిక్స్డ్ నట్స్, జీడిపప్పు వంటి వాటిని రోజూ తినాలి. ఈ ఆహార పదార్థాల్లో ఒమేగా-3 ఫ్యాటీ యాసిడ్స్‌లో పుష్కలంగా ఉంటాయి. తక్కువ గ్లైసెమిక్ ఇండెక్స్ కలిగి ఉంటాయి. అలాగే, వీటిలోని ఇతర లక్షణాలు డయాబెటిక్ ఇన్‌ఫ్లమేషన్, బ్లడ్ షుగర్ ,ఎల్‌డిఎల్ స్థాయిలను తగ్గించడంలో సహాయపడతాయి. కాబట్టి, దాదాపు 30 గ్రాముల గింజలనురోజూ తప్పనిసరిగా తీసుకోవాలి.
తృణధాన్యాలు: రోజువారీ ఫుడ్లో తప్పనిసరిగా బార్లీ , ఓట్స్ వంటి తృణధాన్యాలను చేర్చుకోవవాలి. వీటిలో ఫైబర్ శాతం ఎక్కువగా ఉంటుంది. ఇలాంటి ఫుడ్ జీర్ణం కావడానికి కొంత సమయం పడుతుంది. అవి మీ బ్లడ్ షుగర్ పెరగకుండా నియంత్రిస్తాయి. తృణధాన్యాలలో విటమిన్ బి, ఐరన్ , ఖనిజాలు కూడా పుష్కలంగా ఉంటాయి. ఈ ఆహార పదార్థాలు-ఆరోగ్యకరమైన జీవనశైలి మధుమేహాన్ని అదుపులో ఉంచడంలో ఎంతో సహాయపడతాయి.