365తెలుగు డాట్ కామ్ ఆన్ లైన్ న్యూస్, పాట్నా,అక్టోబర్ 7,2025 : బీహార్‌లో అసెంబ్లీ ఎన్నికల సన్నాహాలు తారాస్థాయికి చేరుకున్నాయి. ఈ కీలక సమయంలో లోక్ జనశక్తి పార్టీ (LJP) అధ్యక్షుడు, కేంద్ర మంత్రి చిరాగ్ పాశ్వాన్ వైఖరి ఎన్డీఏ (NDA) కూటమిలో గందరగోళాన్ని సృష్టిస్తోంది.
బీజేపీతో సీట్ల పంపకాలపై అసంతృప్తిగా ఉన్న చిరాగ్, రాజకీయ వ్యూహకర్త ప్రశాంత్ కిషోర్ (PK) తో పొత్తు చర్చలు జరుపుతున్నారనే వార్తలు బీహార్ రాజకీయాలను కొత్త మలుపు తిప్పుతున్నాయి.
సీట్ల పంపకంపై తీవ్ర ఉత్కంఠ..
ప్రస్తుతం ఎల్జేపీ (రామ్ విలాస్) బీజేపీ మధ్య సీట్ల పంపకాల చర్చలు వేగంగా జరుగుతున్నాయి. బీహార్‌లోని మొత్తం 243 అసెంబ్లీ స్థానాలకు గాను చిరాగ్ పాశ్వాన్ ఏకంగా 40 సీట్లు డిమాండ్ చేస్తుండగా, బీజేపీ కేవలం 25 సీట్లు మాత్రమే ఇవ్వడానికి సిద్ధంగా ఉన్నట్లు సమాచారం.
2024 లోక్‌సభ ఎన్నికల్లో చిరాగ్ పార్టీ 5 స్థానాల్లో పోటీ చేసి అన్నింటిలో విజయం సాధించిన నేపథ్యంలో, అసెంబ్లీ ఎన్నికల్లో ‘గౌరవప్రదమైన’ సీట్లను సాధించడంలో ఆయన పట్టుదలతో ఉన్నారు.
పీకే ఎంట్రీ: బీజేపీపై ఒత్తిడి..!
చిరాగ్ పాశ్వాన్, ప్రశాంత్ కిషోర్ నేతృత్వంలోని జన సురాజ్ పార్టీ (లేదా కిషోర్ వర్గం) మధ్య పొత్తు ఏర్పడే అవకాశాన్ని తోసిపుచ్చలేమని లోక్ జనశక్తి పార్టీ వర్గాలు పేర్కొన్నట్లు ఓ టీవీ నివేదించింది. ఇది నిజమైతే, బీహార్ రాజకీయాల్లో ఇదొక ప్రత్యేకమైన ప్రయోగంగా నిలుస్తుంది.
పీకేతో చిరాగ్ పొత్తు పెట్టుకుంటే, సీట్ల పంపకాల విషయంలో బీజేపీపై మరింత ఒత్తిడి పెరిగే అవకాశం ఉందని రాజకీయ నిపుణులు విశ్లేషిస్తున్నారు. ఈ పొత్తు ఏర్పడినా, భారతీయ జనతా పార్టీ, జేడీయూ,ఆర్జేడీ వంటి ప్రధాన పార్టీల కంటే ఎక్కువ సీట్లు గెలవడం ఎల్‌జేపీకి సవాలుగా మారవచ్చు.
బీజేపీ అగ్రనేతలతో చిరాగ్ కీలక భేటీ..
సీట్ల పంపకాలపై చర్చలు జరుగుతున్నప్పటికీ, చిరాగ్ పాశ్వాన్ బీజేపీ అగ్ర నాయకులతో భేటీ అయిన ఫోటోలు సోషల్ మీడియాలో వైరల్ అవుతున్నాయి. కేంద్ర మంత్రులు ధర్మేంద్ర ప్రధాన్, మంగళ్ పాండే తో చిరాగ్ పాశ్వాన్ బీహార్ ఎన్నికల గురించి చర్చించారు.
ఈ ఫోటోలను బీజేపీ జాతీయ ప్రధాన కార్యదర్శి వినోద్ తావ్డే సోషల్ మీడియాకు చూపించుకుంటూ.. “బీహార్ పురోగతికి ఎన్డీఏ ప్రభుత్వం చాలా అవసరం, అన్ని ఎన్డీఏ కూటమి భాగస్వాములు దీనికి కట్టుబడి ఉన్నారు” అని ట్వీట్ చేశారు.
సీఎం ఆశయం ఉందా..?
బీహార్‌కు చెందిన యువ నాయకుడైన చిరాగ్ పాశ్వాన్‌కు ముఖ్యమంత్రి కావాలనే ఆశయం ఉందనేది బహిరంగ రహస్యం. ఈ ఉదయంఎల్ పి జె తమ ఇన్‌స్టాగ్రామ్ ఖాతాలో “ఈసారి యువ బిహారీ” అనే పోస్టర్‌ను షేర్ చేయడం ఆయన సీఎం ఆశయానికి మరింత బలాన్ని చేకూర్చింది.
మరోవైపు, బీజేపీ, జేడీయూ 200 సీట్లు పంచుకోవడానికి అంగీకరించాయనే వార్తలను చిరాగ్ పాశ్వాన్ వర్గం తోసిపుచ్చింది. తమ సీట్ల పంపకాల చర్చలు జేడీయూతో కాకుండా బీజేపీతోనే జరుగుతాయని చిరాగ్ స్పష్టం చేయడంతో, ఎల్జేపీ, నితీష్ కుమార్ నేతృత్వంలోని జేడీయూ మధ్య ఉద్రిక్త వాతావరణం నెలకొందని స్పష్టమవుతోంది. బీహార్‌లో ప్రభుత్వాన్ని ఏర్పాటు చేయడానికి 122 సీట్ల మ్యాజిక్ నంబర్ అవసరం.