365తెలుగు డాట్ కామ్ ఆన్ లైన్ న్యూస్,న్యూఢిల్లీ ,సెప్టెంబర్ 4,2025: కేంద్ర ప్రభుత్వం GST రేట్లలో భారీ మార్పులను చేసింది. ఈ మార్పులతో సామాన్య ప్రజలు, రైతులు, చిన్న వ్యాపారస్తులు ఉపయోగించే వందలాది వస్తువులు,సేవలు చౌకగా మారాయి. ఇప్పుడు GST కేవలం 5%,18% అనే రెండు ప్రధాన రేట్లు మాత్రమే ఉంటాయి. ప్రధాన మంత్రి నరేంద్ర మోడీ ఇచ్చిన హామీని నెరవేరుస్తూ ఈ మార్పులు చేయడం జరిగింది.
- కొత్త GST రేట్లు ఎప్పటి నుండి అమలులోకి వస్తాయి?
చాలా వస్తువులు,సేవలపై కొత్త GST రేట్లు సెప్టెంబర్ 22, 2025 నుంచి అమలులోకి వస్తాయి. అయితే, సిగరెట్లు,కొన్ని పొగాకు ఉత్పత్తులపై కొత్త రేట్లు తరువాత నోటిఫై చేయబడిన తేదీన అమలులోకి వస్తాయి. - వైద్య రంగంలో GST రేట్లు ఎలా మారాయి?
అన్ని మందులు, ఔషధాలపై 5% రాయితీ GST రేటు వర్తిస్తుంది. దీనివల్ల ఉత్పత్తిదారుల వ్యయాలు పెరగకుండా జాగ్రత్తలు తీసుకున్నారు. క్యాన్సర్ మందులపై జీరో శాతం GST వర్తిస్తుంది. గతంలో 18% ఉన్న ఆరోగ్య ,జీవిత బీమాపై GST పూర్తిగా తొలగించబడింది. - అందం, ఫిట్‌నెస్ సేవలపై GST ఎంత?
హెల్త్ క్లబ్లు, సెలూన్లు, బార్బర్లు, ఫిట్‌నెస్ సెంటర్లు,యోగా సేవలపై గతంలో 18% ఉన్న GST రేటును ఇప్పుడు ఇన్పుట్ టాక్స్ క్రెడిట్ లేకుండా 5%కి తగ్గించారు. - చిన్న కార్ల GST రేటు ఎంత?
అన్ని చిన్న కార్లపై GST రేటు 28% నుంచి 18%కి తగ్గింది. ఇది 1200సీసీ లోపు పెట్రోల్/సీఎన్జీ/ఎల్పీజీ కార్లకు,1500సీసీ లోపు డీజిల్ కార్లకు వర్తిస్తుంది. అలాగే, 350సీసీ లోపు బైక్‌లకు కూడా GST తగ్గింది. - వ్యవసాయ యంత్రాలపై GST రేటు ఎందుకు తగ్గించారు?
రైతులకు ఉపశమనం కలిగించేందుకు స్ప్రించ్లర్లు, డ్రిప్ ఇరిగేషన్ సిస్టమ్స్,కోత యంత్రాలపై GST రేటును 12% నుంచి 5%కి తగ్గించారు. ట్రాక్టర్లు,వాటి టైర్లపై కూడా 5% పన్ను వర్తిస్తుంది. - ఏసీ,టీవీల కొత్త ధరలు ఏమిటి?
ఎయిర్ కండిషనర్,డిష్‌వాషర్‌పై GST రేటును 28% నుంచి 18%కి తగ్గించారు. అన్ని టీవీలు,మానిటర్లు, వాటి సైజుతో సంబంధం లేకుండా, ఇప్పుడు 18% పన్ను పరిధిలోకి వస్తాయి. ఇంతకు ముందు పెద్ద స్క్రీన్ టీవీలపై 28% పన్ను ఉండేది. - హోటల్స్‌పై GST రేటు ఎంత?
ప్రతి రోజుకు ₹7500 లోపు ఉండే హోటల్ వసతి సేవలపై GST రేటును 18% నుంచి 5%కి తగ్గించారు. - గ్యాంబ్లింగ్,ఆన్‌లైన్ గేమింగ్‌పై కొత్త GST రేటు ఎంత?
బెట్టింగ్, క్యాసినో, గ్యాంబ్లింగ్, గుర్రపు పందాలు, లాటరీలు ,ఆన్‌లైన్ మనీ గేమింగ్‌తో సహా అన్ని నిర్దిష్ట చర్యలకు 40% కొత్త GST రేటు వర్తిస్తుంది. - అద్దాలు,గాగుల్స్ పై GST ఎంత?
దృష్టిని మెరుగుపరిచే కళ్లద్దాలు,గాగుల్స్ పై ఇప్పుడు 5% GST వర్తిస్తుంది. ఇతర రకాల గాగుల్స్ పై 18% పన్ను వర్తిస్తుంది. - ఖరీదైన వస్తువులపై కొత్త రేటు ఏమిటి?
1500సీసీ లేదా నాలుగు మీటర్ల కంటే ఎక్కువ పొడవు ఉన్న లగ్జరీ కార్లు, పొగాకు, సిగరెట్లు,ఇతర విలాసవంతమైన వస్తువుల కోసం 40% కొత్త స్లాబ్ ఏర్పాటు చేయనుంది. పాన్ మసాలా, గుట్కా, సిగరెట్, జర్దా వంటి పొగాకు ఉత్పత్తులు ,బీడీలపై కూడా కొత్త రేట్లు వర్తిస్తాయి.
ఈ GST రేట్ల మార్పులతో ప్రభుత్వం పన్ను ఆదాయంలో సంవత్సరానికి ₹47,700 కోట్ల తగ్గుదల ఉంటుందని అంచనా వేస్తున్నారు. అయితే, ఈ చర్యతో సామాన్య ప్రజలకు,చిన్న వ్యాపారస్తులకు పెద్ద ఉపశమనం లభించనుంది.