రోగ నిర్ధారణలో ఐసీఎంఆర్ సరికొత్త విప్లవం.. ఒక్క పరీక్షతో పది రకాల ఇన్ఫెక్షన్స్..

365తెలుగు డాట్ కామ్ ఆన్ లైన్ న్యూస్,జనవరి 21,2026: ఆసుపత్రికి వెళ్లే రోగులకు ఇకపై పరీక్షల తిప్పలు తప్పనున్నాయి. జ్వరం, శ్వాసకోశ ఇబ్బందులతో బాధపడే వారు రకరకాల వ్యాధి నిర్ధారణ పరీక్షల కోసం వేచి చూడాల్సిన అవసరం లేకుండా, ఒకే ఒక్క పరీక్షతో పది రకాల ఇన్ఫెక్షన్లను గుర్తించే దిశగా భారత వైద్య పరిశోధన మండలి (ICMR) అడుగులు వేస్తోంది.

ప్రస్తుతం వైద్యులు అనుమానిత లక్షణాలను బట్టి డెంగ్యూ, మలేరియా, కోవిడ్ లేదా టైఫాయిడ్ పరీక్షలను విడివిడిగా చేయిస్తున్నారు. దీనివల్ల సమయం వృథా అవ్వడమే కాకుండా, చికిత్స ప్రారంభించడంలో జాప్యం జరుగుతోంది. ఈ లోపాన్ని సవరించేందుకు ‘మల్టీప్లెక్స్ మాలిక్యులర్ డయాగ్నొస్టిక్’ అనే అధునాతన విధానాన్ని ఐసీఎంఆర్ తెరపైకి తెచ్చింది.

Read this also..AssetPlus Raises ₹175 Crores to Build the Future of Assisted Wealth Management in India, led by Nexus Venture Partners.

ఇదీ చదవండి..జూబ్లీ హిల్స్‌లో తమ 20వ క్లినిక్ ‘లేయర్స్ ప్రైవ్’ బ్రాంచ్ ను ప్రారంభించిన లేయర్స్ క్లినిక్స్..

ఇదీ చదవండి..ఢిల్లీ, గౌహతిల్లో కోక్ స్టూడియో భారత్ లైవ్ మ్యాజిక్.. శ్రేయా ఘోషల్ ప్రదర్శనతో హోరెత్తిన స్టేజ్!

ఎందుకు ఈ మార్పు..?

సాధారణంగా ఒక రోగి జ్వరంతో వచ్చినప్పుడు, మొదట ఒక వ్యాధి కోసం పరీక్ష చేస్తారు. అది నెగెటివ్ వస్తే మరో పరీక్షకు పంపిస్తారు.ఈ క్రమంలో సరైన వ్యాధి ఏమిటో తెలిసేసరికి పరిస్థితి విషమించే ప్రమాదం ఉంది. వ్యాధి ఏదో తేలకముందే వైద్యులు ‘బ్రాడ్ స్పెక్ట్రమ్’ యాంటీబయోటిక్స్ వాడుతున్నారు. దీనివల్ల శరీరంలోని బ్యాక్టీరియా ఆ మందులకు లొంగని సూపర్ బగ్స్ గా మారుతున్నాయి.
విడివిడి పరీక్షల వల్ల రోగిపై ఆర్థిక భారం పెరుగుతోంది.

ప్రయోజనాలెన్నో..

ఈ ‘సింగిల్ టెస్ట్’ విధానం అందుబాటులోకి వస్తే రోగికి అందించే చికిత్సలో విప్లవాత్మక మార్పులు వస్తాయని శాస్త్రవేత్తలు చెబుతున్నారు.
ఒకే నమూనాతో అన్ని రకాల వైరస్లు, బ్యాక్టీరియాలను తనిఖీ చేయడం వల్ల నిమిషాల్లోనే ఫలితం వస్తుంది. ఏ ఇన్ఫెక్షన్ ఉందో స్పష్టంగా తెలియడం వల్ల అనవసరమైన యాంటీబయోటిక్స్ వాడకం తగ్గుతుంది. దేశంలో ఏదైనా కొత్త మహమ్మారి వ్యాపిస్తుంటే ఈ పరీక్షల ద్వారా వెంటనే గుర్తించి అడ్డుకట్ట వేయవచ్చు.

దేశీ తయారీకి ఊతం..

ఈ కిట్లను తక్కువ ధరకే అందుబాటులోకి తెచ్చేందుకు దేశీయ సంస్థలకు ఐసీఎంఆర్ ఆహ్వానం పలికింది. 2026 నాటికి ఈ పరీక్షలు క్షేత్రస్థాయిలో అందుబాటులోకి వచ్చేలా ప్రణాళికలు రచిస్తోంది. దీనివల్ల ముఖ్యంగా గ్రామీణ ప్రాంతాల్లోని ప్రాథమిక ఆరోగ్య కేంద్రాల్లో తక్కువ ఖర్చుతో మెరుగైన వైద్యం అందుతుందని నిపుణులు భావిస్తున్నారు.