365తెలుగు డాట్ కామ్ ఆన్ లైన్ న్యూస్,హైదరాబాద్,నవంబర్ 1,2025: ఉద్యోగుల భవిష్య నిధి సంస్థ (EPFO) ఉద్యోగులకు శుభవార్త అందించింది. పీఎఫ్ (EPF) నిధులను ఉపసంహరించుకునే ప్రక్రియను మరింత సులభతరం చేస్తూ, వేగవంతం చేస్తూ అనేక నిబంధనలను సరళీకరించింది.
ఈ నిర్ణయాలు కేంద్ర కార్మిక,ఉపాధి శాఖ మంత్రి మన్‌సుఖ్ మాండవీయ అధ్యక్షతన జరిగిన ఈపీఎఫ్‌వో సెంట్రల్‌ బోర్డ్‌ ఆఫ్‌ ట్రస్టీస్‌ సమావేశంలో ఆమోదం పొందాయి.
ఈ సంస్కరణల ద్వారా దేశవ్యాప్తంగా 30 కోట్లకు పైగా చందాదారులకు ప్రయోజనం చేకూరనుంది.
ఉపసంహరణ నియమాలు సరళీకరణ (No Need to Cite Reasons) గతంలో పీఎఫ్ పాక్షిక ఉపసంహరణకు సంబంధించిన 13 రకాల సంక్లిష్టమైన నిబంధనలు ఉండేవి. వాటిని ఇప్పుడు ఏకీకృతం చేసి, కేవలం మూడు సాధారణ విభాగాలుగా వర్గీకరించారు:
ముఖ్యమైన అవసరాలు (అనారోగ్యం, విద్య, వివాహం).
గృహ అవసరాలు (ఇంటి నిర్మాణం, కొనుగోలు).
ప్రత్యేక పరిస్థితులు (నిరుద్యోగం, ప్రకృతి విపత్తులు మొదలైనవి).
కీలక మార్పులివే:
కారణం చెప్పాల్సిన అవసరం లేదు: ‘ప్రత్యేక పరిస్థితులు’ కింద పాక్షిక ఉపసంహరణకు దరఖాస్తు చేసుకునే సభ్యులు ఇకపై ఎటువంటి కారణాలు చెప్పాల్సిన అవసరం లేదు. ఇది క్లెయిమ్ తిరస్కరణలను తగ్గిస్తుంది.
కనీస సర్వీస్ తగ్గింపు: అన్ని రకాల పాక్షిక ఉపసంహరణలకు కనీస సర్వీసు కాలాన్ని గతంలో ఉన్న 5-7 ఏళ్ల నుంచి కేవలం 12 నెలలకు (ఒక సంవత్సరం) తగ్గించారు.
పరిమితి పెంపు: విద్య కోసం పాక్షిక ఉపసంహరణ పరిమితిని 10 సార్లు వరకు, వివాహం కోసం 5 సార్ల వరకు పెంచారు. గతంలో ఈ రెండింటికీ కలిపి మూడు సార్లే అనుమతి ఉండేది.
అత్యవసర ఉపసంహరణ: ప్రత్యేక లేదా అత్యవసర పరిస్థితుల్లో ఎటువంటి ప్రశ్నలు అడగకుండానే ఏడాదికి రెండు సార్లు వరకు అర్హత కలిగిన మొత్తాన్ని విత్‌డ్రా చేసుకోవచ్చు.
ఉద్యోగం కోల్పోయిన వారికి సామాజిక భద్రత
కొత్త సంస్కరణల ద్వారా ఉద్యోగి సామాజిక భద్రతను కూడా ఈపీఎఫ్‌వో పటిష్టం చేసింది.
త్వరిత విత్‌డ్రా: ఉద్యోగం కోల్పోయిన తర్వాత, సభ్యులు వెంటనే తమ పీఎఫ్ నిధిలో 75% వరకు విత్‌డ్రా చేసుకోవచ్చు.
మిగిలిన మొత్తం: మిగిలిన 25% నిధిని ఒక సంవత్సరం తర్వాత విత్‌డ్రా చేసుకోవచ్చు. ఈ నిబంధన వల్ల పీఎఫ్ మొత్తాన్ని పూర్తిగా తీసుకోకుండా, ఉద్యోగుల 10 ఏళ్ల నిరంతర సర్వీసు రికార్డుకు భంగం కలగకుండా, వారి పెన్షన్ ప్రయోజనాలు (Pension Benefits) కోల్పోకుండా రక్షణ లభిస్తుంది.
పెన్షన్ సేవలు ఇంటి వద్దకే..
ఈపీఎఫ్‌వో, ఇండియా పోస్ట్ పేమెంట్స్ బ్యాంక్ (IPPB) సహకారంతో పెన్షనర్ల కోసం కొత్త డిజిటల్ సదుపాయాన్ని అందుబాటులోకి తెచ్చింది. రూ. 95 నామినల్ ఫీజుతో పెన్షనర్లు తమ ఇంటి వద్ద నుంచే డిజిటల్ లైఫ్ సర్టిఫికేట్‌ను పొందే సదుపాయం కల్పించింది.