365తెలుగు డాట్ కామ్ ఆన్ లైన్ న్యూస్, ఖాట్మండు,సెప్టెంబర్ 11,2025: నేపాల్‌లో తాత్కాలిక ప్రధానమంత్రి ఎంపిక ప్రక్రియలో ఊహించని మలుపు చోటు చేసుకుంది. మొదట మాజీ ప్రధాన న్యాయమూర్తి సుశీలా కార్కీ పేరు బలంగా వినిపించినప్పటికీ, ఇప్పుడు ఇంజనీర్ కుల్ మాన్ ఘిసింగ్ పేరు ప్రముఖంగా వినిపిస్తోంది.
యువత, ప్రదర్శనకారులు ఘిసింగ్‌ను ‘దేశభక్తుడు, అందరి ఆదరణ పొందిన నాయకుడు’గా అభివర్ణిస్తూ మద్దతు తెలుపుతున్నారు.
మేయర్ బాలెన్ షా ప్రతిపాదన తిరస్కరణ, ఘిసింగ్‌కు బలం..
ప్రారంభంలో, నిరసనకారులు కాఠ్మండు మేయర్ బాలెన్ షాకు తాత్కాలిక ప్రభుత్వ పగ్గాలు చేపట్టాలని ప్రతిపాదించారు. యువతలో ఆయనకున్న ప్రజాదరణ, ‘రాపర్’ ఇమేజ్ కారణంగా ఆయన పేరును గట్టిగా వినిపించారు. అయితే, బాధ్యతలు స్వీకరించడానికి బాలెన్ షా నిరాకరించినట్లు సమాచారం.
ఈ నేపథ్యంలో, సుశీలా కార్కీ పేరు ముందుకు వచ్చింది. కానీ, ఆమె వయస్సు (73 సంవత్సరాలు) రాజ్యాంగ నిబంధనల (మాజీ న్యాయమూర్తులు ప్రధాని కాలేరనే వాదన) దృష్ట్యా కొందరు నిరసనకారులు అభ్యంతరం వ్యక్తం చేశారు. దీంతో, పలువురి మద్దతుతో కుల్ మాన్ ఘిసింగ్ పేరు మరింత బలంగా మారింది.
‘విద్యుత్ సంక్షోభానికి పరిష్కారం’గా ఘిసింగ్..
నేపాల్‌లో విద్యుత్ సంక్షోభాన్ని తీర్చడంలో కుల్ మాన్ ఘిసింగ్ కీలక పాత్ర పోషించారు. నేపాల్ విద్యుత్ ప్రాధికార సంస్థ (NEA) ఛైర్మన్‌గా ఆయన అందించిన సేవలు ప్రజల మన్ననలు పొందాయి.
ఆయన సమర్థత, దేశభక్తి, అవినీతిపై పోరాట పటిమ ఆయనకు ‘మెస్సీయా’ ఇమేజ్‌ను తెచ్చిపెట్టాయి. రాజకీయాల్లో పాత తరం నాయకులకు భిన్నంగా, సమస్యల పరిష్కారంలో నైపుణ్యం కలిగిన వ్యక్తిగా ఘిసింగ్‌ను యువత భావిస్తోంది.
‘జెన్-జీ’ వర్గం మద్దతు..
ఆరు గంటల పాటు జరిగిన వర్చువల్ సమావేశంలో, బాలెన్ షా, సుశీలా కార్కీ పేర్లతో పాటు కుల్ మాన్ ఘిసింగ్ పేరు కూడా చర్చకు వచ్చిందని ‘జెన్-జీ’ నిరసనకారులు తెలిపారు.
ఘిసింగ్ పేరు ముందుకు రావడం చాలామందికి ఆశ్చర్యాన్ని కలిగించినా, ఆయనకున్న అనుభవం, నిజాయితీ, దేశభక్తి ఆయనను తాత్కాలిక ప్రధాని పదవికి అర్హుడిగా నిలబెడుతుందని వారు విశ్వసిస్తున్నారు.