365తెలుగు డాట్ కామ్ ఆన్ లైన్ న్యూస్, సెప్టెంబర్ 27,2024: నిర్మల్, సోమశిల గ్రామాలు ఉత్తమ పర్యాటక గ్రామాలుగా ఎంపికయ్యాయి. 2024 సంవత్సరానికి గాను కేంద్ర పర్యాటక శాఖ నిర్వహించిన పోటీలలో ఉత్తమ పర్యాటక గ్రామాలుగా నిర్మల్, సోమశిల గ్రామాలు ఎంపికయ్యాయి. ఈ పోటీలలో “క్రాఫ్ట్స్” కేటగిరీలో నిర్మల్ జిల్లా నిర్మల్ గ్రామం, “స్పిరిచ్యువల్ – వెల్నెస్” కేటగిరీలో నాగర్ కర్నూల్ జిల్లా సోమశిల గ్రామం ఎంపిక చేయడం విశేషం.
అవార్డుల ప్రదానోత్సవం..
నేడు ప్రపంచ పర్యాటక దినోత్సవం సందర్భంగా కేంద్ర పర్యాటక శాఖ మంత్రి గజేంద్ర సింగ్ షెకావత్ అధ్యక్షతన ఢిల్లీలోని విజ్ఞాన్ భవన్ లో “భారత ఉపరాష్ట్రపతి” జగ్దీప్ ధన్కడ్ ముఖ్య అతిధిగా ఉండగా అవార్డుల ప్రదానోత్సవం జరిగింది. ఈ అవార్డులను అందుకున్న నిర్మల్ జిల్లా అడిషనల్ కలెక్టర్ ఫైజాన్ అహ్మద్, నిర్మల్ టాయ్స్, ఆర్ట్స్ సొసైటీ అధ్యక్షుడు ఎస్. పెంటయ్య, అలాగే సోమశిల జిల్లా పర్యాటక శాఖ అధికారి టి. నర్సింహా పాల్గొన్నారు. ఈ విజయంతో ఈ రెండు గ్రామాలు పర్యాటక రంగంలో దేశంలోనే ప్రాధాన్యత సంతరించుకున్నాయి.