365తెలుగు డాట్ కామ్ ఆన్ లైన్ న్యూస్, హైదరాబాద్, ఆగస్టు 24,2022: కోటి రూపాయిలు విలువైన మద్యం బాటిళ్లను పోలీసులు ధ్వంసం చేశారు. దాదాపు రూ.1.29 కోట్ల విలువైన అక్రమ మద్యాన్ని ఏలూరు జిల్లా పోలీసులు పెద్ద ఎత్తున ధ్వంసం చేశారు. రెండేళ్లలో స్వాధీనం చేసుకున్న దాదాపు 61,000 మద్యం బాటిళ్లను పోలీసులు, స్పెషల్ ఎన్‌ఫోర్స్‌మెంట్ బ్యూరో అధికారులు ధ్వంసం చేశారు.
ఏలూరులో మద్యం అక్రమ రవాణాకు సంబంధించి జిల్లాలోని 26 పోలీస్ స్టేషన్ల పరిధిలో నమోదైన 1,482 కేసులకు సంబంధించి 61,235 మద్యం బాటిళ్లను స్వాధీనం చేసుకున్నారు. 8,270 లీటర్ల అక్రమ మద్యాన్ని కూడా పోలీసులు ధ్వంసం చేశారు. ఏలూరుజిల్లా ఎస్పీ రాహుల్ దేవ్ శర్మ ఆధ్వర్యంలో జిల్లా పోలీసులు మద్యం బాటిళ్లను ధ్వంసం చేసి కల్తీ మద్యాన్ని పాతిపెట్టారు. ఏలూరు హైవే సమీపంలోని ఏలూరు ఆశ్రమ డిస్పెన్సరీ వద్ద నేలపై జేసీబీతో బాటిళ్లను పగలకొట్టారు.
ఈ కార్యక్రమంలో ఎస్‌ఈబీ జిల్లా ఇంచార్జి అదనపు ఎస్పీ కె.చక్రవర్తి, ఎస్‌ఈబీ సూపరింటెండెంట్ అరుణకుమారి, ఏలూరు ఇంచార్జి డీఎస్పీ పైడేశ్వరరావు, ఇన్‌స్పెక్టర్లు, సబ్ ఇన్‌స్పెక్టర్లు, జిల్లా పోలీసు సిబ్బంది పాల్గొన్నారు. రెండేళ్లుగా స్వాధీనం చేసుకున్న రూ.1.29 కోట్ల విలువైన మద్యం బాటిళ్లను ధ్వంసం చేసినట్లు ఎస్పీ రాహుల్ దేవ్ శర్మ మీడియాకు తెలిపారు.
ఏలూరుజిల్లాల్లోని వివిధ ప్రాంతాల్లో మద్యం అక్రమ రవాణా, కల్తీ మద్యం తయారీ జరగకుండా పోలీసులు ప్రత్యేక దృష్టి సారిస్తున్నట్లు తెలిపారు. కల్తీ మద్యం తయారు చేసే గ్రామాల సంఖ్య తగ్గిందని, ఏడుగురిపై పీడీ యాక్టు కింద కేసులు నమోదు చేశామని వెల్లడించారు. అక్రమ మద్యం అక్రమ రవాణా కేసుల్లో పదే పదే పట్టుబడితే పీడీ యాక్ట్ కింద కేసులు నమోదు చేస్తామని ఎస్పీ హెచ్చరించారు.