365తెలుగు డాట్ కామ్ ఆన్ లైన్ న్యూస్, న్యూఢిల్లీ, నవంబర్ 16,2025: దేశ రాజధాని ఢిల్లీలోని ఎర్రకోట సమీపంలో జరిగిన కారు బాంబు పేలుడు (Red Fort Blast) కేసులో దర్యాప్తు సంస్థలు కీలక వివరాలు వెలికితీశాయి.
ఈ ఆత్మాహుతి దాడికి పాల్పడిన డాక్టర్ ఉమర్ నబీ (Umar Nabi) ఆర్థిక లావాదేవీలు, పేలుడుకు ముందు అతని కదలికల గురించి సంచలన విషయాలు బయటపడ్డాయి.
రూ. 20 లక్షల ఫండ్ ట్రాక్.. సూసైడ్ బాంబర్ ఉమర్కు రూ. 20 లక్షల నిధులు అందినట్లు దర్యాప్తు సంస్థలు గుర్తించాయి. ఈ మొత్తం జైష్-ఎ-మొహమ్మద్ (JeM) ఉగ్రవాద సంస్థ హ్యాండ్లర్ ద్వారా హవాలా నెట్వర్క్ ద్వారా పంపిణీ అయినట్లు అనుమానిస్తున్నారు.
హర్యానాలో రహస్య స్థావరం.. పేలుడుకు ఒక రోజు ముందు వరకు ఉమర్ నబీ హర్యానాలోని నూహ్ (Nuh) ప్రాంతంలో రహస్యంగా తలదాచుకున్నట్లు విచారణలో తేలింది. ఇక్కడి నుంచే అతడు పలు మొబైల్ ఫోన్ల ద్వారా కమ్యూనికేషన్ కొనసాగించాడు.
ఎక్స్ప్లోజివ్ ల్యాబ్..
ఉమర్ ఫరీదాబాద్లోని తన ఇంటి వద్ద పేలుడు పదార్థాలను పరీక్షించడానికి ప్రత్యేక ల్యాబ్ను ఏర్పాటు చేసుకున్నట్లు దర్యాప్తులో వెల్లడైంది. పాకిస్తానీ హ్యాండ్లర్ల సూచనల మేరకు అతడు బాంబులు తయారు చేసేవాడు.
ముందస్తు దాడి: తన సహచరుడు డా. ముజమ్మిల్ షకీల్ అరెస్ట్ కావడంతో, ఉమర్ భయాందోళనకు గురై, డిసెంబర్ 6న బాబ్రీ మసీదు విధ్వంసం వార్షికోత్సవం రోజున చేయాలనుకున్న భారీ దాడిని, ముందస్తుగా ఎర్రకోట వద్ద అసంపూర్ణంగా ఉన్న కారు బాంబుతో చేసినట్లు అనుమానిస్తున్నారు.
మసీదు వద్ద అనుమానితుడి అరెస్ట్..
పేలుడుకు ముందు ఉమర్ సెంట్రల్ ఢిల్లీలోని ఫైజ్-ఎ-ఇలాహీ మసీదును సందర్శించినట్లు సీసీటీవీ ఫుటేజీలో నమోదైంది. ఉమర్ వెనకాలే నడుస్తూ మసీదులోకి ప్రవేశించిన మరో వ్యక్తిని ఢిల్లీ పోలీసులు అదుపులోకి తీసుకుని విచారిస్తున్నారు.
దర్యాప్తు ఏజెన్సీలు ఇప్పుడు ఈ ‘వైట్ కాలర్’ టెర్రర్ మాడ్యూల్ పూర్తి నెట్వర్క్ను ఛేదించేందుకు వేగంగా పనిచేస్తున్నాయి. ఈ దాడిలో మొత్తం 13 మంది మరణించారు.