365తెలుగు డాట్ కామ్ ఆన్ లైన్ న్యూస్, ములుగు 24 డిసెంబర్, 2022: దేశ సంస్కృతిలో పండ్లు, కూరగాయలు, పూలు ఒక భాగమని, అలాగే ఔషధ పంటల‌పై పరిశోధనలు విస్తృతం చేయాలని తెలంగాణ రాష్ట్ర గవర్నర్ తమిళిసై సౌందరరాజన్ అన్నారు.
విద్యార్థులు వ్యవసాయం, ప్రత్యేకించి ఉద్యాన కోర్సులు ఎంచుకోవడం సంతోషంగా ఉందని, తద్వారా దేశానికి సేవ చేయడానికి ముందుకొస్తున్నారని గవర్నర్ చెప్పారు.
సిద్దిపేట జిల్లా ములుగులోని ప్రధాన కార్యాలయంలో జరిగిన కొండా లక్ష్మణ్ తెలంగాణ రాష్ట్ర ఉద్యాన విశ్వవిద్యాలయం రెండవ స్నాతకోత్సవానికి గవర్నర్ అధ్యక్షత వహించారు.
ఈ సందర్భంగా గవర్నర్ మాట్లాడుతూ..విశ్వవిద్యాలయం పండ్లు, కూరగాయలు, పూల ఉత్పత్తిలో కీలక పాత్ర పోషించాలని, సమతుల ఆహారంలో కూరగాయలు, పండ్లు ముఖ్యమని పేర్కొన్నారు.
కోవిడ్ సమయంలో పండ్లు, కూరగాయలు ప్రాధాన్యత చూశామని, కరోనా సమయం పౌష్టికాహారం పట్ల పాఠాలు నేర్పాయని, అందమైన వనాల రూపకల్పనలో ఉద్యాన పట్టభద్రుల కృషి అవసరమని అని గవర్నర్ గుర్తు చేశారు.
ఉద్యాన పంటల సాగు, మార్కెటింగ్, ఎగుమతుల్లో వృద్ధి కనిపిస్తుందని తెలంగాణ గవర్నర్ తమిళిసై సౌందరరాజన్ అన్నారు.
పండ్లు, కూరగాయలు, పూల పంటల సాగు, ఉత్పత్తి, ఉత్పాదకత పెంపు కోసం కృషి చేయాలి. మన పూర్వీకులు సంప్రదాయ ఆహారం తీసుకున్నారని, అప్పట్లో జీవనశైలి వ్యాధులైన బీపీ, మధుమేహం లేవని గవర్నర్ అన్నారు.
తమిళనాడులో రకరకాల బియ్యం అందుబాటులో ఉన్నాయి. అదే తెలుగు నేలపై పాలీష్డ్ రైస్ కు మనం అధిక ప్రాధాన్యత ఇస్తున్నాం. బియ్యం తగ్గిస్తూ ప్రత్యామ్నాయంగా చిరుధాన్యాలు, పండ్లు ఆహారంలో భాగం చేసుకోవాలని గవర్నర్ కోరారు.
భారత వ్యవసాయ పరిశోధన మండలి హార్టికల్చరల్ సైన్స్ డిప్యూటీ డైరెక్టర్ జనరల్ డాక్టర్ ఆనంద్ కుమార్ సింగ్ చీఫ్ గెస్ట్ గా హాజరయ్యారు.
ఈ సందర్భంగా ఆయన మాట్లాడుతూ పర్యావరణ మార్పులు నేపథ్యంలో వ్యవసాయ ఉద్యాన పంటల ఉత్పత్తి, నాణ్యత పెంచడంలో శాస్త్ర సాంకేతికత భాగస్వామ్యం అవసరమని చెప్పారు.
మార్కెట్ ఉన్న పంటల సాగు చేయడం, కోతానంతర వ్యవసాయ నష్టాలను తగ్గించడంతో పాటు రోబోటిక్స్, డ్రోన్స్, ఆర్టిఫిషియల్ ఇంటెలిజెన్స్, జీనోమ్ ఎడిటింగ్, బయోటెక్నాలజీ వంటి ఆధునిక పద్ధతులను ఉపయోగించుకోవాలని చెప్పారు.
తక్కువ వనరులతో ఎక్కువ ఉత్పాదకత సాధించడమే లక్ష్యంగా వ్యవసాయ అనుబంధ రంగాలలో పరిశోధనలు ముమ్మరం కావాలని ఆయన కోరారు.
విద్యార్థులకు గోల్డ్ మెడల్స్..
విశ్వవిద్యాలయం రెండవ స్నాతకోత్సవంలో మొత్తం 575 డిగ్రీ పట్టాలు ఇవ్వగా, అందులో 482 అండర్ గ్రాడ్యుయేట్, 76 పోస్ట్ గ్రాడ్యుయేట్, 17 పీహెచ్.డి పట్టాలు విద్యార్థులకు అందజేశారు.
అలాగే అండర్ గ్రాడ్యుయేట్ లో 3బ్యాచ్ లకు 3 యూనివర్సిటీ గోల్డ్ మెడల్స్, అలాగే PG లో 2 బ్యాచులకు 2 యూనివర్సిటీ గోల్డ్ మెడల్స్, అలాగే PG లో మరో ఆరు స్పాన్సర్ గోల్డ్ మెడల్ లు కలిపి మొత్తంగా 11 బంగారు పతకాలు అత్యధిక ఓ జి పి ఏ సాధించిన విద్యార్థులకు గవర్నర్ అందించారు.
సాయి సుప్రియకు మూడు గోల్డ్ మెడల్స్..
పీజీలో అత్యధిక ఓజిపిఎ సాధించినందుకు గాను పల్లెర్ల సాయి సుప్రియ మూడు గోల్డ్ మెడల్స్ అందుకున్నారు.
పీజీలోని అన్ని విభాగాల్లో టాపర్ గాను, మహిళల్లో టాపర్ గాను, అలాగే కూరగాయలు ఎమ్మెస్సీ కూరగాయల విభాగంలో అత్యధిక ఓ జిపిఏ సాధించినందుకు ఈ మూడు బంగారు పతకాలు సాధించారు.
అలాగే ఎద్దుల గాయత్రి, స్నేహప్రియ, సంధ్యారాణి బంగారు పథకాలు అందుకున్నారు.