ఉపాధి పథకంలో గ్రామాభివృద్ధి: కొత్త పనులు చేర్చుకోవాలని పవన్ కళ్యాణ్ విజ్ఞప్తి

365తెలుగు డాట్ కామ్ ఆన్ లైన్ న్యూస్,నవంబర్ 27,2024: మహాత్మా గాంధీ జాతీయ ఉపాధి హామీ పథకంలో భాగంగా సాగిస్తున్న పనుల్లో సీసీ రోడ్లు, డ్రైయిన్లు, అంగన్వాడీ భవనాలు, వ్యవసాయ ఉత్పత్తుల గిడ్డంగులు, మహిళా స్వయం సహాయక సంఘాల భవనాలు నిర్మాణం తదితర వాటికి సంబంధించిన అంచనా వ్యయం నిధులను పెంచాలని రాష్ట్ర ఉప ముఖ్యమంత్రి పవన్ కళ్యాణ్ కేంద్ర గ్రామీణాభివృద్ధి శాఖ మంత్రి శివరాజ్ సింగ్ చౌహాన్ కి విజ్ఞప్తి చేశారు.

ఢిల్లీ పర్యటనలో భాగంగా కేంద్ర మంత్రులతో సమావేశమైన పవన్ కళ్యాణ్, శివరాజ్ సింగ్ చౌహాన్ తో కీలక అంశాలపై చర్చించారు. ఈ సందర్భంగా, గ్రామాభివృద్ధికి సంబంధించిన ప్రతిపాదనలు కేంద్ర మంత్రి దృష్టికి తీసుకెళ్లారు.

పవన్ కళ్యాణ్ అభిప్రాయాలు:

• ఉపాధి పథకంలో కూలీల బడ్జెట్ పెంపు: “కూలీల వేతన నిధులు ₹2081 కోట్లను వెంటనే విడుదల చేసినందుకు కృతజ్ఞతలు. ఈ పథకంలో కూలీల వేతనాలను పెంచడం చాలా ఫలప్రదమైనదిగా ఉంటుంది.”
• ప్రాజెక్టులు, వాటర్ షెడ్ల నిర్మాణం: “రాష్ట్రానికి 59 అధునాతన వాటర్ షెడ్ ప్రాజెక్టులను కేటాయించడం ఆనందదాయకం.”
• కాఫీ తోటల పెంపకం: “గిరిజనుల ఆర్థిక సంక్షేమానికి కాఫీ తోటల పెంపకాన్ని ప్రోత్సహిస్తున్నాం.”
• పిఎమ్ ఆవాస్ యోజన: “ఇళ్ల నిర్మాణానికి 90 రోజులు పని సమయం ఇచ్చే పథకంలో, అదనంగా 100 రోజులు పని సమయం కల్పించాలని కోరుకుంటున్నాం.”
• గ్రామాభివృద్ధి పనులు: “శ్మశానవాటికలు, పంచాయతీ భవనాలకు ప్రహరీల నిర్మాణం, దోబిఘాట్లు, ఆరోగ్య సబ్ సెంటర్లు, తాగునీటి పనులు ఉపాధి పథకంలో చేర్చినట్లయితే గ్రామీణ ప్రజలకు మరింత ఉపయోగపడతాయి.”
• వాటర్ షెడ్ పథకం: “కరవు ప్రాంతాలలో ఈ పథకం చాలా అవసరం. రాష్ట్ర వాటా నిధులను తగ్గించి 90 : 10 నిష్పత్తి ప్రకారం నిధుల కేటాయింపులు జరిపేలా కృషి చేయాలని కోరుకుంటున్నాం.”
• గ్రామీణ రోడ్ల నిర్మాణం: “గ్రామీణ రోడ్ల నిర్మాణానికి ప్రాధాన్యత ఇవ్వాలి. 2,643 గ్రామాలకు అనుసంధాన రోడ్లు వేయాలని నిర్ణయించాం, కానీ PMGSY కింద 413 మాత్రమే నిర్మించడానికి అనుమతి లభించింది. 2,230 గ్రామాలకు ఇంకా అనుసంధాన రోడ్లు వేయాల్సి ఉంది.”
• ఆంతర్గత గ్రామ రోడ్ల అభివృద్ధి: “పాఠశాలలు, ఆస్పత్రులు, మార్కెట్లు, పరిపాలన భవనాలకు వెళ్లే రోడ్లను మెరుగు పరిచేందుకు కేంద్రం చొరవ చూపాలి.”
• జనాభా 100 దాటిన గ్రామాలకు అనుసంధాన రోడ్లు: “100 జనాభా దాటిన గ్రామాలకు కూడా పథకంలో చోటు కల్పించి రోడ్ల నిర్మాణం చేపట్టాలని కోరుకుంటున్నాం.”

ఈ ప్రతిపాదనలు దేశంలోని గ్రామాభివృద్ధి దిశగా కీలక మార్పులు తీసుకొస్తాయని పవన్ కళ్యాణ్ పేర్కొన్నారు.