పల్లకీపై మోహినీ అలంకారంలో శ్రీ పద్మావతి అమ్మవారు.

365తెలుగు డాట్ కామ్ ఆన్ లైన్ న్యూస్,డిసెంబర్ 2,2024: తిరుచానూరు శ్రీ పద్మావతి అమ్మవారి కార్తీక బ్రహ్మోత్సవాల్లో భాగంగా ఐదో రోజు సోమవారం ఉదయం, అమ్మవారు మోహినీ అలంకారంలో పల్లకీపై ఊరేగి భక్తులకు దివ్య అనుగ్రహాన్ని ప్రసాదించారు.

భౌతికంగా జగన్మోహకత్వాన్ని ప్రతిబింబించే ఈ అవతారం, ఆధ్యాత్మికంగా మాయాతీత శుద్ధ సాక్షాత్కారాన్ని ఒకే సమయంలో అందించే ప్రత్యేకత కలిగినది.

ఉదయం 11.30 గంటల నుంచి మధ్యాహ్నం 1 గంట వరకు శ్రీ కృష్ణస్వామి మండపంలో అమ్మవారికి శాస్త్రోక్తంగా స్నపన తిరుమంజనం నిర్వహించనున్నారు. ఈ పుణ్యకార్యంలో పసుపు, చందనం, పాలు, పెరుగు, తేనె, పన్నీరు,వివిధ రకాల ఫలాలతో అభిషేకం చేస్తారు.

మధ్యాహ్నం 3.30 గంటల నుంచి సాయంత్రం 5 గంటల వరకు వసంతోత్సవం వైభవంగా నిర్వహించనున్నారు.

బ్రహ్మోత్సవాలలో భాగంగా రాత్రి 7 గంటల నుంచి 10 గంటల వరకు శ్రీ పద్మావతి అమ్మవారు గజ వాహనంపై విశేషంగా భక్తులకు దర్శనమివ్వనున్నారు.

ఈ వేడుకల్లో తిరుమల శ్రీశ్రీశ్రీ పెద్ద జీయర్ స్వామి, శ్రీశ్రీశ్రీ చిన్న జీయర్ స్వామి, టీటీడీ ఈవో జె. శ్యామల రావు, జేఈవో వీరబ్రహ్మం, ఆలయ డెప్యూటీ ఈవో గోవింద రాజన్, ఆలయ అర్చకులు బాబు స్వామి,ఇతర అధికారులు పాల్గొన్నారు.