365తెలుగు డాట్ కామ్ ఆన్ లైన్ న్యూస్,నేషనల్,జూన్ 20, 2025: ఇజ్రాయెల్, ఇరాన్‌ల మధ్య ఉద్రిక్తతలు పెరుగుతున్న వేళ, అమెరికా అధ్యక్షుడు డొనాల్డ్ ట్రంప్ కీలక నిర్ణయం తీసుకోబోతున్నారు. ఇరాన్ సైనిక, అణు కార్యక్రమాలపై ఇజ్రాయెల్ సాగిస్తున్న పోరులో అమెరికా భాగస్వామ్యంపై రెండు వారాల్లో నిర్ణయం తీసుకుంటానని వైట్‌హౌస్ ప్రకటించింది. ఈ పరిణామం ప్రపంచవ్యాప్తంగా ఉత్కంఠ రేపుతోంది.
ట్రంప్‌ను వెంటాడుతున్న ‘ఇరాన్’ డైలమా
ఇరాన్‌తో డీల్‌కు ఇంకా ఆశలున్నాయని వైట్‌హౌస్ వర్గాలు చెబుతున్నాయి. ఇరాన్ అణు కార్యక్రమంపై ఇజ్రాయెల్, అమెరికా డిమాండ్లకు సంబంధించి దౌత్యపరమైన చర్చలకు ఇంకా అవకాశం ఉందని ట్రంప్ భావిస్తున్నారట. “ఇరాన్‌తో త్వరలో చర్చలు జరిగే అవకాశం ఉందా, లేదా అనే దానిపై ఆధారపడి, నేను రాబోయే రెండు వారాల్లో నా నిర్ణయం తీసుకుంటాను” అని ట్రంప్ వ్యాఖ్యానించినట్లు వైట్‌హౌస్ ప్రెస్ సెక్రటరీ కరోలిన్ లెవిట్ తెలిపారు.
ఇజ్రాయెల్ ప్రధాని బెంజమిన్ నెతన్యాహు మాత్రం ట్రంప్‌పై పూర్తి నమ్మకంతో ఉన్నారు. “అమెరికాకు ఏది మంచిదో అదే ట్రంప్ చేస్తారు. ఆయన ఇప్పటికే చాలా సహాయం చేస్తున్నారు” అని నెతన్యాహు అన్నారు.
ఇది కూడా చదవండి…ఐఎంటి హైదరాబాద్ 2025–27 బ్యాచ్ కోసం మేనేజ్‌మెంట్ ఓరియెంటేషన్ ప్రోగ్రామ్‌తో కొత్త విద్యా సంవత్సరం ప్రారంభం..
ఇది కూడా చదవండి…సూపర్ నేచురల్ థ్రిల్లర్ విరాటపాలెం ట్రైలర్ విడుదల..
ఖమేనీపై దాడి ప్రణాళిక లేదా?
ఇటీవల ఇజ్రాయెల్, ఇరాన్ సుప్రీం లీడర్ ఖమేనీని హతమార్చే ప్రణాళికను అమెరికా అధ్యక్షుడు ట్రంప్ వీటో చేశారన్న వార్తలు వచ్చాయి. దీనిపై ట్రంప్ స్పందిస్తూ, “ఆయన్ని చంపే ప్రణాళికేదీ లేదు, కనీసం ఇప్పుడైతే కాదు” అని తేల్చిచెప్పారు.
ఇజ్రాయెల్‌పై ఇరాన్ ప్రతీకార దాడులు
బీర్షేబాలోని సరోకా ఆసుపత్రి, టెల్ అవీవ్‌లోని పలు నివాస భవనాలపై ఇరాన్ క్షిపణి దాడులు చేసింది. ఈ దాడుల్లో 240 మంది గాయపడ్డారు. వీరిలో నలుగురి పరిస్థితి విషమంగా ఉంది. ఈ దాడికి ప్రతీకారంగా ఇజ్రాయెల్, ఇరాన్ సుప్రీం లీడర్ అలీ ఖమేనీని లక్ష్యంగా చేసుకుంటామని హెచ్చరించింది.
నెతన్యాహు శపథం: ఖమేనీని అంతం చేస్తాం!
ఆసుపత్రిపై జరిగిన దాడికి ఖమేనీనే కారణమని ఇజ్రాయెల్ ప్రధాని బెంజమిన్ నెతన్యాహు ఆగ్రహం వ్యక్తం చేశారు. ఖమేనీని అంతం చేసే వరకు యుద్ధం కొనసాగిస్తామని శపథం చేశారు. అయితే, కొన్ని రోజుల క్రితం ఖమేనీని హతమార్చే ఇజ్రాయెల్ ప్రణాళికను అమెరికా అధ్యక్షుడు డొనాల్డ్ ట్రంప్ అడ్డుకున్నారని, “ఇరాన్ నేతను ఇప్పుడే చంపే ప్రణాళిక లేదు” అని ట్రంప్ పేర్కొన్నారని తెలిసిందే.
ఈ పరిణామాలు మధ్యప్రాచ్యంలో మరో పెద్ద యుద్ధానికి దారితీస్తాయా అనేది వేచి చూడాలి. ట్రంప్ తన రెండు వారాల గడువులో ఎలాంటి నిర్ణయం తీసుకుంటారోనన్న ఉత్కంఠ నెలకొంది.