365తెలుగుడాట్ కామ్ ఆన్ లైన్ న్యూస్,హైదరాబాద్,13,2025: తెలుగు చిత్ర పరిశ్రమలో తీవ్ర విషాదం నెలకొంది. విలక్షణ నటుడు, సీనియర్ నటుడు కోట శ్రీనివాసరావు (83) ఈ తెల్లవారుజామున తుదిశ్వాస విడిచారు.
గత కొంతకాలంగా వృద్ధాప్య సంబంధిత అనారోగ్య సమస్యలతో బాధపడుతున్న ఆయన, ఆదివారం తెల్లవారుజామున 4 గంటల సమయంలో హైదరాబాద్లోని తన స్వగృహంలోనే కన్నుమూశారని కుటుంబ సభ్యులు తెలిపారు.
కోట శ్రీనివాసరావు మరణవార్త తెలుసుకున్న సినీ, రాజకీయ ప్రముఖులు, అభిమానులు తీవ్ర దిగ్భ్రాంతికి గురయ్యారు. ఆయన మృతి పట్ల ప్రగాఢ సానుభూతిని వ్యక్తం చేస్తూ, సోషల్ మీడియా వేదికగా నివాళులర్పిస్తున్నారు.
నాలుగు దశాబ్దాల నట ప్రస్థానం..
1942 జూలై 10న కృష్ణా జిల్లా కంకిపాడులో జన్మించిన కోట శ్రీనివాసరావు, నాలుగు దశాబ్దాలకు పైగా సినీ రంగంలో తనదైన ముద్ర వేశారు. తెలుగుతో పాటు తమిళం, హిందీ, కన్నడ, మలయాళ భాషల్లో సుమారు 750కి పైగా చిత్రాల్లో నటించి మెప్పించారు.
విలన్ గా, క్యారెక్టర్ ఆర్టిస్ట్ గా, హాస్య నటుడిగా ఎన్నో విభిన్నమైన పాత్రలను పోషించి ప్రేక్షకుల మదిలో చెరగని స్థానాన్ని సంపాదించుకున్నారు.
‘ప్రాణం ఖరీదు’తో తెరంగేట్రం..
నాటకరంగం నుంచి సినీ రంగ ప్రవేశం చేసిన కోట శ్రీనివాసరావు, 1978లో విడుదలైన ‘ప్రాణం ఖరీదు’ చిత్రంతో తెలుగు తెరకు పరిచయమయ్యారు.
ఆ తర్వాత ‘ప్రతిఘటన’, ‘ఆహా నా పెళ్లంట’, ‘గణేష్’ వంటి ఎన్నో విజయవంతమైన చిత్రాల్లో కీలక పాత్రలు పోషించారు. ఆయన సంభాషణలు పలికే తీరు, పాత్రలో లీనమయ్యే శైలి ఆయనకు ప్రత్యేక గుర్తింపు తెచ్చింది.
పద్మశ్రీ పురస్కార గ్రహీత..
కోట శ్రీనివాసరావు తన నట జీవితంలో ఎన్నో అవార్డులు, పురస్కారాలు అందుకున్నారు. 2015లో భారత ప్రభుత్వం ఆయనను ‘పద్మశ్రీ’ పురస్కారంతో గౌరవించింది. అలాగే, తొమ్మిది నంది అవార్డులు కూడా అందుకున్నారు.
రాజకీయాల్లోనూ సేవలందించి..
నటనా రంగంలోనే కాకుండా, రాజకీయాల్లోనూ కోట శ్రీనివాసరావు కొంతకాలం క్రియాశీలక పాత్ర పోషించారు. 1990వ దశకంలో భారతీయ జనతా పార్టీ (బీజేపీ)లో చేరి, 1999లో విజయవాడ తూర్పు నియోజకవర్గం నుంచి ఎమ్మెల్యేగా గెలిచి ప్రజాసేవ చేశారు.
నేడు అంత్యక్రియలు..
కోట శ్రీనివాసరావు పార్థివదేహాన్ని ఈరోజు మధ్యాహ్నం 12:30 గంటలకు జూబ్లీహిల్స్ లోని మహాప్రస్థానానికి అంతిమ యాత్రగా తీసుకెళ్లనున్నారు. మధ్యాహ్నం 3:30 గంటలకు ప్రభుత్వ లాంఛనాలతో అంత్యక్రియలు నిర్వహించ నున్నారు.
ఆయన మృతి తెలుగు సినీ రంగానికి తీరని లోటని సినీ వర్గాలు, అభిమానులు విచారం వ్యక్తం చేస్తున్నారు. కోట శ్రీనివాసరావు ఆత్మకు శాంతి కలగాలని ప్రార్థిస్తున్నారు.