365తెలుగు డాట్ కామ్ ఆన్ లైన్ న్యూస్,అక్టోబర్ 11,2025: సుప్రిమ్ హీరో సాయి దుర్గ తేజ్ హైదరాబాద్‌లో జరిగిన ది ఫాస్ట్ & క్యూరియస్ – ఆటో ఎక్స్పో 2015 కార్యక్రమంలో పాల్గొన్నారు. ఈ ఈవెంట్‌లో అభిమానులు అడిగిన పలు ప్రశ్నలకు ఆయన సమాధానాలు ఇచ్చారు.
సవాళ్లు ఎదురైనప్పుడు మధ్యలోనే పనిని వదిలేయకుండా, పట్టుదలతో ముందుకు సాగాలని సాయి దుర్గ తేజ్ సూచించారు.
ఈ కార్యక్రమంలో ఆయన మాట్లాడిన విషయాలు ఇలా ఉన్నాయి:“నేను నా ప్రొఫైల్‌తో ఎన్నో ఆఫీసుల చుట్టూ తిరిగాను. నా ఫోటోలను కొందరు పల్లీలు, బఠానీలు తినడానికి కవర్‌లుగా ఉపయోగించారు.
అలా తిరుగుతున్న సమయంలో ఒకసారి మంచు మనోజ్ గారి ఆఫీస్‌లో వైవీఎస్ చౌదరీ గారు నన్ను చూశారు.
అలా ‘రేయ్’ చిత్రం ప్రారంభమైంది. కానీ ఆ సినిమా షూటింగ్ సమయంలో చాలా ఆర్థిక సమస్యలు ఎదురయ్యాయి. అయినా, నేను పట్టువదలకుండా కృషి చేశాను. 2012లో ఒక సినిమా చేస్తున్న సమయంలో ఒక ప్రముఖ నటుడు చనిపోయారు.
మళ్లీ 2013లో జగపతి బాబుతో రీ-షూట్ చేశాం. రాజకీయ కారణాల వల్ల ఆ సినిమా కూడా ఆలస్యమైంది. ఎన్ని సమస్యలు వచ్చినా, నా కలలను మాత్రం ఎప్పటికీ వదలలేదు.
పవన్ కళ్యాణ్ గారు నాకు గురువు లాంటి వారు. చిన్నప్పటి నుంచి నన్ను గైడ్ చేస్తూ, ప్రతి విషయంలో ఎంకరేజ్ చేస్తున్నారు. యాక్టింగ్ ట్రైనింగ్, జిమ్నాస్టిక్స్, డ్యాన్స్, కిక్ బాక్సింగ్ వంటి అన్ని రంగాల్లో నాకు మార్గనిర్దేశం చేశారు. కాలేజీలో ఉండే ఫేవరేట్ టీచర్‌లా పవన్ కళ్యాణ్ నాకు ఎల్లప్పుడూ సపోర్ట్ చేస్తారు.
నేను ప్రతి పరిస్థితిని తేలికగా తీసుకుంటాను, ఏదీ సీరియస్‌గా తీసుకోను. ఎంత కష్టమైన సిట్యువేషన్ వచ్చినా, నవ్వుతూ దాన్ని దాటేస్తాను.
హాస్పిటల్‌లో ఉన్న తర్వాత బయటకు వచ్చినప్పుడు అందరూ అడిగితే, ‘కోమాలో ఉన్నాను’ అని చెప్పలేదు, ‘హాస్పిటల్‌కు చిల్ చేయడానికి వెళ్లాను’ అని చెప్పాను.
అందరూ హెల్మెట్ ధరించండి, వేగంగా డ్రైవ్ చేయొద్దు, జాగ్రత్తగా ఉండండి. యాక్సిడెంట్ తర్వాత నాకు చాలా సమస్యలు వచ్చాయి, మాటలు కూడా సరిగ్గా రాలేదు. నేను ఎన్నో పుస్తకాలు చదివేవాడిని, చాలా వ్యాయామం చేసేవాడిని.
నాకు ‘రిపబ్లిక్’ సినిమా చాలా ఇష్టం, దాని క్లైమాక్స్ కూడా బాగా నచ్చింది. అలాంటి కథలు మళ్లీ వస్తే తప్పకుండా చేస్తాను. సోషల్ మీడియా అకౌంట్లకు ఆధార్‌ని లింక్ చేయడం మన బాధ్యత అని నేను భావిస్తాను.
చిరంజీవి తో ‘ఫాస్ట్ అండ్ ఫ్యూరియస్’ లాంటి స్టోరీ చేయాలనే కోరిక ఉంది. నా గ్యారేజ్‌లో రాయల్ ఎన్‌ఫీల్డ్, మహీంద్ర థార్ నాకు ఇష్టమైనవి. ముఖ్యంగా 1968 షెల్బీ జీటీ 500 మస్టంగ్ మోడల్ కారు నా డ్రీమ్ కారు. ఎప్పటికైనా ఆ కారుని కొంటాను.”