365తెలుగు డాట్ కామ్ ఆన్ లైన్ న్యూస్, ఆన్ లైన్ న్యూస్,ఆగస్టు 4,2024: మొబైల్ సేవలకు అంతరాయం ఏర్పడితే, వినియోగదారుడు పరిహారం క్లెయిమ్ చేయవచ్చు. టెలికాం సేవల నాణ్యతా ప్రమాణాలను సవరిస్తూ టెలికాం రెగ్యులేటరీ అథారిటీ ఆఫ్ ఇండియా (ట్రాయ్) జారీ చేసిన నోటిఫికేషన్‌లో కొత్త నిబంధనలు చేర్చింది.
జిల్లా స్థాయిలో 24 గంటలకు పైగా మొబైల్ సేవలకు అంతరాయం కలిగితే కంపెనీలు వినియోగదారులకు పరిహారం చెల్లించాలి. నాణ్యతా ప్రమాణాలు పాటించకుంటే చెల్లించాల్సిన జరిమానాను కూడా రూ.50 వేల నుంచి రూ.లక్షకు పెంచారు. ఉల్లంఘన స్థాయిని బట్టి లక్ష, రెండు లక్షలు, ఐదు లక్షలు,పది లక్షలు వంటి వివిధ గ్రేడ్‌లలో జరిమానా విధించనున్నారు. సెల్యులార్ మొబైల్ సేవలు, బ్రాడ్‌బ్యాండ్ సేవలు, బ్రాడ్‌బ్యాండ్ వైర్‌లెస్ సేవల కోసం మునుపటి ప్రత్యేక నిబంధనల స్థానంలో కొత్త నియమ, నిబంధనలు ప్రవేశపెట్టారు.
పోస్ట్‌పెయిడ్ కస్టమర్‌కు అక్టోబర్ 1 తర్వాత సర్వీస్ అంతరాయం కలిగితే, ఆ రోజు అద్దె మొత్తం తదుపరి బిల్లు నుంచి తీసివేయనున్నారు. ఇది ఏప్రిల్ 2025 నుంచి ప్రీపెయిడ్ కస్టమర్లకు అందుబాటులో ఉంటుంది. అంటే ప్రీపెయిడ్ కస్టమర్ 12 గంటల కంటే ఎక్కువ సమయం తమ సేవలకు అంతరాయం కలిగితే, ఒక రోజు అదనపు వ్యాలిడిటీ క్రెడిట్ చేయబడుతుంది. ఈ పరిహారం వారంలోగా చెల్లించాలి.
ఒక జిల్లా లేదా రాష్ట్రంలో కనీసం నాలుగు గంటలపాటు సేవకు అంతరాయం కలిగితే కంపెనీలు TRAI అధికారులకు తెలియజేయాలి. అంతరాయం ఏర్పడిన జిల్లాలో నమోదైన నంబర్లకు మాత్రమే ప్రయోజనాలు లభిస్తాయి. సర్వీస్ అంతరాయం ఏర్పడితే ఫిక్స్‌డ్ లైన్ సర్వీస్ ప్రొవైడర్లు పోస్ట్‌పెయిడ్, ప్రీపెయిడ్ కస్టమర్లకు కూడా పరిహారం చెల్లించాలి. ప్రకృతి వైపరీత్యాల కారణంగా సేవను కోల్పోతే, పరిహారం చెల్లించబడదు. ఈ కొత్త నిబంధనలు ఆరు నెలల్లో అమల్లోకి రానున్నాయి.
కొత్త చట్టంలో బ్రాడ్‌బ్యాండ్ కనెక్షన్‌ను నిర్దిష్ట కాలపరిమితిలోపు అందుబాటులోకి తీసుకురావాలని కూడా పేర్కొంది ట్రాయ్. దీని ప్రకారం, కస్టమర్ నుంచి చెల్లింపు పొందిన తర్వాత కంపెనీలు ఏడు రోజుల్లో బ్రాడ్‌బ్యాండ్ కనెక్షన్‌ను అందించాలి. 2G, 3G, 4G, 5G కవరేజ్ అందుబాటులో ఉన్న జియోస్పేషియల్ మ్యాప్‌లలో కంపెనీలు ప్రదర్శించాలి. ఈ విధంగా కస్టమర్ బెస్ట్ సర్వీస్ ప్రొవైడర్ ఎవరో తెలుసుకున్న తర్వాత కనెక్షన్‌లను పొందవచ్చు.
ఇదికూడా చదవండి:అస్సాంలో టాటా గ్రూప్ 27,000 మందికి ఉపాధి కల్పించే సెమీకండక్టర్ ప్రాజెక్ట్‌ ప్రారంభం